النائب اسلام اكمل قرطام …في أي عمل، دايمًا في خطة، وفي تنفيذ، وفي نتائج. ولما النتائج ما تبقاش بالشكل اللي كنا متمنينه، التغيير بيبقى وارد وطبيعي. بس قبل أي تغيير، لازم نكون فاهمين: إيه المشاكل اللي حصلت؟ هل كانت في التخطيط؟ ولا في الإدارة؟ ولا في أدوات التنفيذ؟ ولا في التنسيق؟

الفهم ده هو اللي بيخلّي اختيار المسؤول الجديد اختيار صح،
وشخص خبراته مناسبة يعالج المشاكل اللي ظهرت قبل كده.

ونفس المنطق ينطبق على أي تعديل وزاري.
ضخ دماء جديدة وخبرات مختلفة شيء مهم ومفيد،
وده لا يقلل من اللي سبقوا.

لكن علشان التغيير ينجح ويحقق نتائج أفضل،
لازم نكون محددين إحنا بنغيّر علشان نحل إيه بالظبط.

إحنا مش بندوّر على وجوه جديدة وخلاص،
إحنا بندوّر على ضمانات حقيقية للتنفيذ.
عايزين نعرف إيه الفرص اللي الحكومة الجديدة ناوية تشتغل عليها،
وإيه التحديات اللي محضّرة نفسها تواجهها،
لأن المواطن المصري مستني نتائج حقيقية تفرق في حياته اليومية.

وفي اعتقادي، من أهم الملفات اللي بنعاني منها حاليًا هو الملف الاقتصادي،
والسؤال هنا:
هل الحكومة الجديدة عندها برنامج واضح لحل المشاكل دي؟
هل عندها أدوات حقيقية لتحسين أوضاع المواطن المصري؟

دي أسئلة يتعين على البرلمان البحث فيها وفهمها،
ومتابعة ومراقبة إنها تتحقق على أرض الواقع،
وإلا ساعتها يبقى التغيير مجرد تغيير أسماء وبس.

#اسلام_قرطام