اسلام قرطام (مجرد راى )يعلق الحقيقة فيه حاجة مش قادر أفهمها. الفان زون كانت معمولة بشكل جميل جدًا، وجمعت شبابًا وأطفالًا وعائلات وناسً كتير نازلة تستمتع وتشجع منتخب بلدها وتعيش أجواء مختلفة.

فإزاي حد يصحى من الفجر عشان يروح يشجع منتخب وطنه، وبعد ما يكسب يعبر عن فرحته بإتلاف أو تكسير حاجة معمولة أصلًا عشانه وعشان غيره؟

أنا هنا مش بتكلم على كرة القدم.

أنا بتكلم على الفكرة.

لأن الشخص اللي ما عندوش مشكلة يتلف حاجة عامة، أو يسيء استخدام حاجة معمولة لخدمته وخدمة غيره، هو غالبًا نفس الشخص اللي يرمي في الشارع، واللي يركن صف تاني ويعطل الناس، واللي يحط رجله على الكرسي قدامه، واللي ما يقومش لكبير سن واقف، واللي يتعامل مع أي شيء مشترك بين الناس على إنه مالوش قيمة.

المشكلة الحقيقية إن الشخصية دي غالبًا ما بتفكرش غير في نفسها.

وفي الآخر النتيجة إيه؟

إن الفان زون اتقفلت في المباراة الجاية، وناس كتير كانت مستنية تروح وتعيش نفس الأجواء اتحرمت منها بسبب تصرفات غير مسؤولة من آخرين.

وعشان كده، فالموضوع بالنسبة لي مش كرة قدم، لأن أكيد عندنا أولويات أكبر وأهم.

ومش موضوع بين باجز أو أي حاجة اتكسرت.

لكن أحيانًا التفاصيل الصغيرة جدًا بتكشف مشاكل أكبر بكتير.

ولقيت إن المشهد البسيط ده كان معبر بشكل واضح عن أزمة أعمق: أزمة احترام المكان، واحترام حق الآخرين، والإحساس إن اللي معمول لينا كلنا لازم نحافظ عليه كلنا.

ودي في رأيي قضية أخلاق قبل ما تكون أي حاجة تانية.

أما بقى لو هنتكلم عن أسباب أزمة الأخلاق، أو أسباب عدم احترام الممتلكات والمنشآت العامة، فده موضوع أكبر بكتير و محتاج بوست تاني لوحده